Algengar spurningar

Fyrir aðgerð

Í hvernig fötum er best að koma?

Farðu í góða sturtu kvöldið fyrir aðgerð og aftur að morgni aðgerðardags. Þvoðu þér með mildri sápu en ekki nota snyrtivörur, farða né rakakrem á aðgerðasvæðið. Taktu naglalakk, eyrnalokka, skartgripi og alla pinna af þér. Komdu í þægilegum víðum fatnaði sem auðvelt er að fara í og úr. Við mælum með t.d. renndum peysum og joggingbuxum og þægilegum skóm sem auðvelt er að smeygja sér í og úr.

Má taka lyf eins og vanalega?

Í eina viku fyrir aðgerð mælum við með því að þú reynir að sleppa því að taka bólgueyðandi lyf á borð við magnyl, hjartamagnyl, asperín, íbúfen, naproxen, voltaren, vóstar o.fl.

Þessi lyf þynna blóðið. Í staðinn máttu nota paracetamól og/eða parkódín.

Þá skaltu einnig reyna að sleppa því að taka lýsi og omega 3 fitusýrur því það þynnir einnig blóðið.

Hvernig undirbý ég mig fyrir svæfingu?

Ef aðgerðin er gerð í svæfingu eða slævingu áttu að koma fastandi sem þýðir að þú mátt ekki borða mat eða drekka í 6 klukkustundir fyrir aðgerð.

Þó er leyfilegt að drekka vatn þar til fjóra tíma fyrir aðgerð.

Þú hittir svæfingalækni áður en aðgerðin fer fram og hann fer yfir heilsufar þitt, lyf sem þú tekur, lyfjaofnæmi, fyrri svæfingar, ógleðisögu, hæð og þyngd ásamt fleiru.

Í svæfingu og slævingu eru þér gefin lyf sem hafa mjög sljóvgandi áhrif á taugakerfið (jafnvel þó þú takir ekki alveg eftir því þegar þú vaknar).

Af þessum orsökum getur verið áttu ekki að aka bíl í sólarhring eftir aðgerð og því leggjum við mikla áherslu á að þú látir einhvern sækja þig til okkar – og setjist ekkert undir stýri næsta sólarhringinn.

Svæfingarlæknirinn sér svo um verkjastillingu eftir aðgerðina.

Má reykja fyrir og eftir aðgerð?

Ef þú vilt sjá sem mestan árangur af aðgerðinni og flýta fyrir bataferlinu þá áttu að hætta að reykja 6 vikum fyrir aðgerð og reykja svo ekkert í að minnsta kosti í tvo mánuði eftir að aðgerðin fór fram.

Reykingar hafa neikvæð áhrif á blóðflæði húðarinnar. Ótal rannsóknir sýna fram á að þau sem reykja hafa 40% hærri sýkingartíðni en þau sem ekki reykja og hærri tíðni á húðdrepi, blóðtappa, lungnabólgu eftir svæfingu ásamt fleiri kvillum.

Hvenær get ég farið heim?

Ef um staðdeyfingu er að ræða þá ferðu heim að aðgerð lokinni, en ef þú varst í svæfingu/slævingu þá þarftu að dvelja í einhverja stund í vöknunarstofunni hjá okkur.

Þú færð svo verkjalyf eftir þörfum þar til þú hefur jafnað þig og getur farið heim.

Akstur

Mundu að láta einhvern koma að sækja þig. Þú mátt ekki undir neinum kringumstæðum aka bíl beint eftir aðgerð nema þú hafir bara farið í staðdeyfingu, án verkja og deyfilyfja.

Áður en þú ferð heim, færðu endurkomutíma og lyfseðil fyrir verkjalyfjum eftir því sem þörf er á.

Eftir aðgerð

Hvað geri ég þegar heim er komið?

Þegar þú kemur heim skaltu taka því rólega og forðast mikla áreynslu.

Mikil áreynsla getur t.d. verið að halda á þungum hlutum, pokum og töskum, að halla sér fram, líkamsrækt og þessháttar.

Mikil áreynsla getur aukið blæðingahættu og jafnvel valdið því að þú verður miklu lengur að ná þér. Mar og bólga verða lengur að hverfa og einnig getur skurðurinn opnast.

Þó hvetjum við þig til að hreyfa þig eðlilega, samanber venjulegar athafnir daglegs lífs en hafa alltaf í huga að hlífa aðgerðarsvæðinu.

Það er mjög mikilvægt að nærast vel eftir aðgerð. Borðaðu mat eins og þú ert vön/vanur og reyndu að halda orkunni uppi fyrstu tvo sólarhringana, t.d. með því að neyta ávaxtasafa, orkudrykkja eða annars sem gefur orku.

Það skiptir miklu máli að drekka vel af vökva eftir aðgerð þar sem mikið vökvatap fylgir öllum aðgerðum, þó sérstaklega fitusogi og svuntuaðgerðum.

Má ég borða hvað sem er?

Það er mjög mikilvægt að nærast vel eftir aðgerð. Borðaðu mat eins og þú ert vön/vanur og reyndu að halda orkunni uppi fyrstu tvo sólarhringana, t.d. með því að neyta ávaxtasafa, orkudrykkja eða annars sem gefur orku.

Það skiptir miklu máli að drekka vel af vökva eftir aðgerð þar sem mikið vökvatap fylgir öllum aðgerðum, þó sérstaklega fitusogi og svuntuaðgerðum.

Hvenær má ég fara í sturtu?

Yfirleitt er hægt að fara í sturtu um tveimur til þremur dögum eftir aðgerð en sumar aðgerðir, eins og t.d. svuntuaðgerð og brjóstaminnkun, krefjast þess að þú hafir umbúðirnar á þar til þú mætir í endurkomu.

Gufuböð, sundferðir og annað í þeim dúr þarf að bíða með þar til 3-4 vikur eru liðar frá aðgerð ef þú ert með sauma sem eyðast sjálfir. Hinsvegar er allt í lagi að fara í sund, bað og gufu eftir að venjulegir saumar hafa verið teknir . Sárið er gróið og skorpan alveg farin af. Þetta á til dæmis við um augnlokaaðgerðir og blettatöku.

Hvenær má ég byrja aftur að vinna?

Það er mjög mismunandi hversu langur tími líður þar til þú getur snúið aftur til vinnu. Þetta fer allt eftir umfangi aðgerðar og heilsunni þinni.

Eftir brjóstastækkun er algengt að konur geti farið aftur í vinnu eftir 4 til 7 daga, svo lengi sem um skrifstofustörf eða önnur störf sem reyna ekki mikið á líkamann er að ræða.

Eftir svuntuaðgerð þarf að lágmarki að bíða í 10 daga, augnlokaaðgerðir 3 til 4 daga og eftir fitusog er hægt að fara aftur í vinnu eftir um tvo daga.

Að þessu sögðu viljum við þó taka fram að þetta er nokkuð einstaklingsbundið og verður metið út frá hverjum og einum í endurkomutíma.

Hvenær má ég byrja að mála mig?

Krem eða aðrar snyrtivörur má ekki nota á aðgerðasvæði fyrstu tíu dagana eftir aðgerð. Ekki vera úti í sól að minnsta kosti fyrstu tvær vikurnar án sterkra sólarvarna, að minnsta kosti 50.

Ekki stunda neinar íþróttir, æfingar, hlaup eða skokk eða annað sem þú svitnar við í sex vikur eftir aðgerð.

Gefðu líkamanum tíma til að græða sárin.

Bataferlið

Hvernig minnka ég líkurnar á að fá mikil ör?

Ör eru rauð og hörð til að byrja með. Þau verða ljósari og mýkri með tímanum og oftast eru þau orðin alveg ljós og mjúk að hálfu til einu ári liðnu. Árangur aðgerðar er því ekki hægt að meta fyrr en að þeim tíma loknum.

Forðast ber að láta sól skína á örið fyrstu sex mánuðina eftir aðgerð og notaðu alltaf góða og sterka sólarvörn, sólgleraugu og hatta sem skýla vel ef aðgerðin var á andliti. Með þessu forðast þú að fá roða í örin.

Athugaðu einnig að sólarvörn getur runnið af ef þú svitnar mikið.

Örið verður fínna ef þú hlífir því með plásturslímbandi í 3-6 mánuði eftir aðgerð. Plásturslímbandið er brúnt, framleitt af 3M og fæst í flestum apótekum.

Gott er að bera E-vítmínolíu á ör eða annað sem virkar græðandi á sár.

Hvað eru eðlilegar bólgur?

Aðgerðarsvæðið bólgnar alltaf eftir aðgerð og nær bólgan hámarki á öðrum til þriðja degi. Eftir það byrjar hún að hjaðna.

Mesta bólgan er horfin eftir eina til þrjár vikur en það geta liðið nokkrir mánuðir þar til hún er öll horfin.

Hvað er mikil bólga? 

Ef bólga kemur skyndilega á fyrsta sólarhringnum, er hugsanlega blæðing undir húðinni sem þarf að stöðva. Ef um svona blæðingu ræðir þá finnur þú skyndilega fyrir verri verkjum sem verkjalyfin ná ekki að deyfa.

Þú finnur einnig fyrir meiri þrýstingi og eymslum í kring um aðgerðarsvæðið.

Það þarf því einstaka sinnum að opna skurðinn aftur, fjarlægja blóðköggul og stöðva blæðinguna. Ef þetta kemur upp á, sem er mjög sjaldan, er það venjulega á fyrstu klukkustundum eftir aðgerð.

Má ég búast við að verða mikið marin?

Marblettir láta einnig sjá sig eftir allar aðgerðir.

Það getur verið mjög mismunandi eftir einstaklingum hvað þeir eru lengi sýnilegir en hjá flestum eru marblettir alveg horfnir eftir 2-3 vikur.

Til að minnka líkurnar á miklu mari og marblettum er gott að sleppa bólgueyðandi lyfjum og lýsi þar sem það getur haft blóðþynnandi áhrif.

Þá er einnig gott að reyna að kæla aðgerðarsvæðið til að minnka bæði mar og bólgur. Best er að kæla í stuttan tíma, nokkrum sinnum yfir daginn eftir minni aðgerðir en ef þú fórst í svuntuaðgerð eða brjóstaaðgerð mælum við ekki með kælingum.

Fæ ég niðurgreiðslu frá Tryggingastofnun?

Ef Tryggingarstofnun tekur þátt í aðgerðinni þá greiðir sjúklingur sinn hluta eftir aðgerð.

Hluti sjúklings fer eftir því hvaða aðgerð er gerð, hvort hann er með afsláttarkort eða hvort um öryrkja eða ellilífeyrisþega er að ræða. Hvað börn varðar þá þurfa foreldrar eða forráðamenn þeirra að framvísa tilvísun frá heimilislækni til að Tryggingastofnun taki þátt í niðurgreiðslu aðgerðarinnar.

Ef um fegrunaraðgerð er að ræða sem Tryggingastofnun tekur ekki þátt í þá þarf að greiða aðgerðina fyrirfram á viðeigandi bankareikning.

Ef bráðavandamál koma upp þegar heim er komið, fyrsta sólarhringinn eða svo – hringdu þá í GSM númerið sem þú færð með þér að aðgerð lokinni eða hafðu samband við viðkomandi læknastofu á skrifstofutíma.

Umræða um sílikonpúða

Ágúst hefur notað púða frá Mentor frá 2008. Þetta eru mest rannsökuðu púðar í heiminum og hafa reyst mjög vel. Eftir 10 ára notkun eru 96,9% kvenna sem nota MENTOR® MemoryShape® púða eða CPG™ Gel púða ánægðar með útkomuna.

Klínísk gögn sýna að MENTOR® MemoryGel™ brjóstapúðar og CPG™ Gel brjóstapúðar eru með fæstar tilkynningar um helstu fylgikvilla 10 árum eftir frumaðgerð til stækkunar.

Sílíkónmagnið sem brjóstapúðar gefa frá sér er minna en það magn sem vörur sem eru notaðar dagsdaglega á heimilum gefa frá sér!

Ef vandamál koma upp fylgir ævilöng ábyrgð svo þú getur skipt vörunni út fyrir nýja**

Öryggið hefur verið prófað í klínískum rannsóknum með 190.000+þátttakendum.

Ítarlegri upplýsingar um Mentor púða má lesa hér